Friday, September 4, 2015

الخلاف والاختلاف


"رأيي صواب يحتمل الخطأ ... ورأي غيري خطأ يحتمل الصواب"


مش كل حاجة هتعجبك هتعجب باقي الناس ومش كل حاجة انت مؤمن بيها ومعتقدها هتكون عند الناس بنفس التأثير ومش اي حاجة بالنسبة لك صح او غلط هتكون كده بالنسبة لباقي الناس وعلي رأي المثل 

لولا اختلاف الاذواق لبارت السلع

الناس فيما يعشقون مذاهب


كلنا متفقين علي ان اي انسان من حقة يحب اللي هو عاوزه ويكره اللي هو عاوزه ويؤمن او يكفر باللي هو عاوزه لكن مش من حق حد يفرض رأيه علي التاني او انه يجبر الناس انها تبقي شبهه.

للاسف الخلاف والنزاع موجود في بلادنا من ايام الانظمة القبليه ... كل قبيله عندها عاداتها وتقاليدها مينفعش حد يخرج عنها ودايما بتحاول تفرضها علي باقي القبائل .... وهنا هتلاقي رئيس القبيله هو المهيمن علي باقي الافراد في اتخاذ القرارات والاحكام وحتي فرض رأيه من  غير نقاش.

ومن هنا هتلاقي الاب بيقلد الجد في كل حاجه وبيفرض علي الابن انه يمشي علي نفس المنوال ... فعادي جدا تلاقي واحد بيحارب بكل ما اوتي من قوة علي حاجة هو مش فاهمها.

علي عكس الدول المتقدمة تماما اللي بتغرس ثقافة الاختلاف والنقاش والاقناع وعدم فرض الرأي واحترام رأي الاخر.

ربنا خلقنا مختلفين في حاجات كتير جدا عشان نتعرف ونشارك وكل واحد يكمل التاني مش عشان نبقي كلنا شبه بعض وبنعمل نفس الحاجه :

"يا أيها الناس إنا خلقناكم من ذكر وأنثي وجعلناكم شعوبا وقبائل لتعارفوا إن أكرمكم عند الله أتقاكم إن الله عليم خبير"


من هنا نعرف ان الناس مختلفين في كل حاجه من اول خلقهم لكلامهم وافعالهم ولو قدرنا نفهم مقولة الامام الشافعي 
"رأيي صواب يحتمل الخطأ ... ورأي غيري خطأ يحتمل الصواب" هتتحل معظم مشاكلنا وساعتها كل واحد هيسمع التاني باهتمام ولو حد مصر علي رأيه هيقدم ادلة وبراهين مش هيتخانق وخلاص.

روي ان هارون الرشيد قال للإمام مالك رضي الله عنهما "يا أبا عبد الله .. نكتب هذه الكتب ونفرقها في آفاق الاسلام لنحمل عليها الامه"
قال "يا أمير المؤمنين .. إن اختلاف العلماء رحمة من الله علي هذه الامة .. كل يتبع ما صح عنده .. وكل علي هدي وكل يريد الله "

عَنِ الضَّحَّاكِ ، عَنِ ابْنِ عَبَّاسٍ ، قَالَ : قَالَ رَسُولُ اللَّهِ صَلَّى اللَّهُ عَلَيْهِ وَسَلَّمَ : " مَهْمَا أُوتِيتُمْ مِنْ كِتَابِ اللَّهِ فَالْعَمَلُ بِهِ لا عُذْرَ لأَحَدٍ فِي تَرْكِهِ ، فَإِنْ لَمْ يَكُنْ فِي كِتَابِ اللَّهِ فَسُنَّةٌ مِنِّي مَاضِيَةٌ ، فَإِنْ لَمْ تَكُنْ سُنَّةً مِنِّي فَمَا قَالَ أَصْحَابِي ، إِنَّ أَصْحَابِي بِمَنْزِلَةِ النُّجُومِ فِي السَّمَاءِ ، فَأَيُّمَا أَخَذْتُمْ بِهِ اهْتَدَيْتُمْ ، وَاخْتِلافُ أَصْحَابِي لَكُمْ رَحْمَةٌ "

لكن ممكن بسهولة جدا اليومين دول ان واحد يكون قاعد مع صاحبه ويختلفوا علي حاجة تافهة جدا وتتحول لجدل ومنها لخناقة صغيرة ومنها لمد إيد ومنها يقاطعوا بعض وكل ده علي حاجة ملهاش اي لازمة في الحياة



فلن ترضي عنك الناس مهما فعلت

والسلام

Tuesday, June 17, 2014

Valculator: My very first app

valculator هو اول برنامج عملته واول علاقة ليا بمجال الموبايل وهو عباره عن اله حاسبة بتشتغل بالصوت تقوله مثلا ٢+٣ بصوتك ويرد عليك بالناتج

ساعتها كان اندرويد (v2.3) لسه جديد وبدانا نتعلمه انا واصحابي ( علاء رمضان - احمد ناصر - احمد عبد السميع - محمد الشاهد ) وبعدين قررنا نعمل اول برنامج لينا ويبقي اونلاين والناس تنزله.

كنا ساعتها لسه مبتدأين ومنعرفش ايه المفروض يتعمل نهائي ومحدش فينا تعامل مع سمارت فون قبل كدة  ... نزلنا اشترينا موبايل عشان نجرب عليه وسهرنا يوم عشان ندور ونشوف احنا نقدر نعمل حاجه زي كدة ولا لأ.

لقينا طريقة نقدر نحول بيها الصوت لكلام مكتوب وجربناها وعملنا كل حاجه شغاله وكان ناقص اهم حاجة الشكل الخارجي (design).

ساعتها كنا في ٣ كلية ومنعرفش يعني اية برنامج هينزل للناس وايه مستوي الجودة ولا اي حاجة .... دخل احمد ناصر فتح برنامج الرسام ورسم شكل اله حاسبة وطلع صورة png  :) .



حطينا الصورة وحطينا زراير مخفية مكان الزراير علي الصورة وطبعا اماكنها ثابته ومحطوطة بناء علي مقاس التليفون اللي معانا :)

ونزلنا البرنامج وكان فيه اعلانات كمان ... الغريب ان في ناس شكرت فيه والباقي كان بيعلق تعليق محترم انه بايظ ويقول بايظ ازاي.

- طبعا فهمت ان انا عامل مصيبة واضطريت افتح ال png واقطع الزراير واحط كل حاجه لوحدها بناء علي مقاس الشاشة.

من الجدير بالذكر انه عمل اكتر من ١٠٠٠ داولود علي app store اسمه slideme وحوالي ٤٠٠ علي google play

** انا كنت في قمة السعادة وانا بسمع الارقام دي ... ١٥٠٠ واحد معرفهمش شافوا شغلي وفي منهم الل عجبه كمان :) **

الدروس المستفادة :
- عشان تتعلم لازم تطلع حاجة وتاخد راي الناس فيها حتي لو مش اد كده
- لو عندك اي فكرة ابدأ نفذ فيها طالما عندك وقت فاضي حتي لو اي كلام او مش قد كدة طلعها وشوف رد فعل الناس عليها .... لو مش عارف تتعمل ازاي دور وهتلاقي طريقة
- اوعي تتكسف تطلع حاجه حتي لو مش شغالة كويس ... مش هتخسر حاجة طالما بتتعلم ومش لازم تقول انها بتاعتك.
- التجربة في حد ذاتها ممتعة وتستحق المجهود وهتخليك تكتشف حدود مهارتك وتخليك تعرف انت تقدر توصل لحد فين.
- بغض النظر من العك اللي في البرنامج دي كانت اكبر حاجة موجودة في السي في بعد مشروع التخرج.

** من الجدير بالذكر ان كلنا تقريبا شغالين في مجال الموبايل الحمد لله **

Friday, November 22, 2013

ان الله جميل يحب الجمال

يعني ايه جمال ؟؟؟

الجمال هو صفه بتزود قيمة الشئ مهما كان وبتخلي الواحد مبسوط من الشئ ده تلقائيا وهو واحد من القيم الثلاثه : الجمال والحق والخير.

الجمال في كل حاجه ... منظر الشجر والحدائق ... منظر الشمس ساعة الغروب ... صوت تغريد العصافير ... الابتسامه ... الكلمه الحلوه ... النظافه ... كل شيء مخلوق جميل ولكن في تلوث حواليه.

للاسف حاليا في مصر الناس عينها اتعودت علي التلوث دايما ... كنت مره في المواصلات وكان منظر الغروب وهمي فطلعت التليفون اصوره، اللي جنبي قالي ده انت دماغك رايقه وعندك فراغ مع انه قاعد جنبي مش بيعمل اي حاجه علي الاطلاق ومكلفش نفسه يتفرج علي المنظر حتي.

الناس في كل مكان بتسألني انت ليه دايما مبتسم ... السؤال اللي انا بسأله بقي وليه مبتسمش ... الابتسامه مش بفلوس.

لما دايما تشوف حوار بين واحد بيقنع واحد انه مايرميش زباله في الشارع عشان المنظر العام بيكون رده ما كده كده الشارع في زباله. مفيش اي معايير للجمال في مصر اطلاقا طبيعيه او صناعيه او اي افتكاسه.

للاسف بحس ان الناس شايفه ان في تعارض كبير بين الجمال والتدين ... لما بلبس طقم محترم وشكله حلو في ناس بتبقي شايفاني بتنطط عليهم واني بحاول ابقي نجم وكده.

في جمال الهيئة قال صلي الله عليه وسلم : ( إن الله يحب أن يرى أثر نعمته على عبده ) رواه الترمذي .
من هذا المنطلق كان رسول الله – صلى الله عليه وسلم – خير أسوةٍ وأفضل قدوة ، بما اشتُهر به من جمال الهيئة ، وحسن السمت ، والاعتناء بالزينة ، ليجمع بين جمال الروح وأناقة المظهر ، وطيب الرائحة  .
فكان – صلى الله عليه وسلم – يعتني بترجيل شعره ، وتسريح لحيته ، وكان لديه شعرٌ طويل يصل إلى أذنيه.
وفي كلّ الأحوال ، لم يكن اهتمام النبي – صلى الله عليه وسلم – بشعره مبالغاً فيه ، بل كان يحذّر من الإفراط في ذلك.
بمعني انك لازم تهتم ان شكلك يكون كويس لكن ميكونش ده كل همك في الحياة.

التلوث في كل مكان ... تلوث بصري من زباله لكتابه اي هري علي اي حيطه ... تلوث سمعي من شتائم لاغاني اوكا واورتيجا لتسلم الايادي ... تلوث جو من سجاير لدخان لبلي ازرق.

للاسف نتيجه لده غاب الجمال والرقي في التعامل بين الناس ... فيه تدني في مستوي كل حاجه.
لو قلت لواحد يااه شايف النيل ومنظر المياه حاجه ترد الرووح ... ممكن يقول عليك اهبل للاسف ... او غني ومعاك فلوس ومش حاسس باللي الناس فيه.

قال الشاعر : 
أيّهذا الشّاكي وما بك داء ... كن جميلا تر الوجود جميلا

قال الشاعر في جمال الاخلاق : 
ليس الجمال جمال الوجه والحسب وانما الجمال جمال الاخلاق والأدب



هنا ربنا بيوصف الحدائق بانها سبب من اسباب السرور : 
 أَمَّنْ خَلَقَ السَّمَوَاتِ وَالأَرْضَ وَأَنزَلَ لَكُمْ مِنْ السَّمَاءِ مَاءً فَأَنْبَتْنَا بِهِ حَدَائِقَ ذَاتَ بَهْجَةٍ

هنا ربنا بيأمر سيدنا محمد بالجمال في التعامل بان يسامح من اساء اليه بغير عتاب
 فَاصْفَحِ الصَّفْحَ الْجَمِيلَ

عَن عَلْقَمَةَ ، عَن عَبْداللهِ ، قَالَ : قَالَ رَسُولُ اللهِ صلى الله عليه وسلم: لاَ يَدْخُلُ الْجَنَّةَ مَنْ كَانَ فِي قَلْبِهِ مِثْقَالُ ذَرَّةٍ مِنْ كِبْرٍ ، وَلاَ يَدْخُلُ النَّارَ ، يَعْنِى ، مَنْ كَانَ فِي قَلْبِهِ مِثْقَالُ ذَرَّةٍ مِنْ إِيمَانٍ ، قَالَ : فَقَالَ لَهُ رَجُلٌ : إِنَّهُ يُعْجِبُنِي أَنْ يَكُونَ ثَوْبِي حَسَنًا ، وَنَعْلِي حَسَنَةً ؟ قَالَ : إِنَّ اللَّهَ يُحِبُّ الْجَمَالَ ، وَلَكِنَّ الْكِبْرَ مَنْ بَطَرَ الْحَقَّ ، وَغَمَصَ النَّاسَ. أخرجه أحمد 1/412(3913) و\"مسلم\" 1/65(179).


كان جه عليا فتره من الزمن (شهر تقريبا) بحاول مشوفش اي حاجه حواليه شكلها وحش او اعمل نفسي مش شايفها وكانت النتيجه شويه صور زي دي من يومي الطبيعي وانا رايح للشغل عادي جدا ويكأني اول مره امشي في الطريق 









والسلام :)


Tuesday, August 6, 2013

فلوووووس

تخيل نفسك معزوم عند حماتك علي العشاء وعامله الاكل اللي انت بتحبه واليوم جميل والكل مبسوط، ومره واحده بعد ما كله كل وتمام ، خرجت محفظتك وعايز تحاسب حماتك علي ثمن الاكل :) !!!

تن تن تااااااااااا

حماتك وشها احمر ومراتك مضايقه وكله متنرفز ... ايه اللي حصل ؟؟ ليه كله كان سعيد لما كنت بتاكل ببلاش ولما جيت تدفع ثمن اللي كلته كله بقي متنرفز ومش عايز يبص في وشك ؟؟؟

اللي حصل ان الانسان الواحد عايش في عالمين مختلفين في نفس الوقت :

- اول واحد عباره عن حياه اجتماعيه (Social Norms) مكون من الاصدقاء وطلباتهم. ممكن تساعدني انقل العفش ؟؟؟ ازق العربيه ؟؟؟ اغير العجله بتاع العربيه وهكذا ؟؟؟ دي طبيعه انسانيه تلقائيه يعني لما تنقل مع جارك دولاب اكيد مش هتستناه ينقل معاك دولاب تاني يوم :)

- تاني واحد عباره عن قواعد السوق والتعامل بالفلوس وهات وخد ومرتبات وايجار وفوايد (Market Norms)، التعاملات دي مش شريره ولا حاجه بس في العالم ده انت بتاخد علي اد اللي بتدفعه .

طول ما حياتك الاجتماعيه في طريق وتعاملاتك الماليه في طريق يبقي انت كده عايش حياه سليمه وزي الفل :).
اول ما الاتنين دول بيتقابلوا بيحصل مصيبه.

تخيل واحد خارج مع خطيبته وبعد ما قضوا اليوم وعملوا كل حاجه، وهما مروحين قالها الاكل اتكلف كذا والتاكسي خد كذا واليوم كله اتكلف كذا :) ... اكيد مش هتعرفه تاني بعد فضيحه طبعا :)

كان في تجربه معموله عباره عن لعبه علي الكمبيوتر ( في كوره في يمين الشاشه وصندوق في الشمال والمطلوب انك تنقل اكبر عدد من الكور في الصندوق بالماوس في مده خمس دقائق). في ناس هتعملها مقابل 5 جنيه وناس هتعملها مقابل ربع جنيه وناس هتعملها خدمه مجانا.

الناس اللي خدت خمسه جنيه نقلوا في متوسط 159 كوره والناس اللي خدت ربع جنيه نقلوا 101 كوره، تتوقع الناس اللي مخدوش فلوس خالص نقلوا كام ؟؟ اشتغلوا اكتر ولا اقل ؟؟؟؟

النتائج بتقول ان غياب العامل المادي خلي الناس تتعامل انها خدمه اجتماعيه لشخص تاني فنقلوا 168 كوره اكتر من الناس اللي خدت فلووس .... في امثله كتير توضح ازاي الواحد ممكن يشتغل خدمه لواحد اكتر بكتير من انه يشتغل عشان ياخد فلووس.

في المثال اللي فات كان ممكن الواحد يقول انا بعمل خدمه لشخص واديني باخد ربع جنيه احسن من مفيش، لكن طالما الفلوس دخلت في الموضوع متبقاش خدمه خلاص والتفكير بيبقي ان الربع جنيه اقل بكتير من المجهود اللي هضيعه.

طب هل لو بدلت الفلوس بهديه الناس هتزعل برده ولا لأ ؟؟ يعني لو جبت لحماتك هديه بدل ما تدفع ثمن الاكل هتزعل ولا لأ ؟؟ لو اخذت مثلا شوكولاته في التجربه بتاع الكمبيوتر بدل الخمسه او الربع الجنيه ؟؟ هتتعامل علي انها خدمه ولا علي انها مقابل مادي برده ؟؟؟

طالما ماجتش سيرة الفلوس الناس بتفضل تتعامل اجتماعيا زي الفل ومبتزعلش من بعض.

مشكلة الهديه انك ممكن تجيب حاجه غاليه الناس متعرفش قيمتها ... او الناس مبتحبهاش وبتفضل حاجه تانيه وتضييع لوقتك عشان تختارها. بس تخيل معايا كده انت رايح لواحد تقوله انا كنت هجيبلك هديه ب50 جنيه بس خفت متعجبكش او متعرفش تقدر ثمنها فقولت اديك ال50 جنيه تعمل بيها اللي انت عايزه :)

حاجه كمان؛ انك تطلب من واحد صاحبك خدمه ده شيء جميل ويسعدكوا انتوا الاتنين، انك تطلبها منه كذا مره هيحس انك بتستغله  كمان لما تطلب خدمه من واحد في مهنته يعني تروح لنجار تقوله اعملي المكتب ده خدمه. فهيحاول يبعد عنك بأي طريقه عشان يوقف الاستغلال ده.

الشركات مؤخرا بدأت تفهم ده وبدأت تسوق لنفسها علي انها من العائله وشعارات بقي "انت تقدر تحقق حلمك واحنا معاك وهنساعدك ووراك ومش هنسيبك" والكلام ده. ده بيفيدهم بولاء المستخدمين ليهم اوي . بس في حاجه دايما الشركات بتنساها وهي ان طالما انها هتعامل العملاء معامله اجتماعيه واصحاب وحبايب وبعدين آجي اتاخر في دفع الفاتوره يوم واحد يحصل مشاكل والخدمه تقف ولازم ترجع علي الاقل بعد كام ساعه وكلام كتيير كده.

مينفعش الشركه تعامل الشخص كواحد من العائله شويه، وكاي شركه بتاخد فلوس من واحد بعد 5 دقائق والا العميل هيتخنق منها ويسيبها ويمشي ويقعد يشتم فيها مابين كل اللي يعرفهم.

في شركات برضه حاولت تعمل ده مع الموظفين وحاولت تحسسهم انهم اسره واحده واديتهم لابتوبات وموبايلات اخر حاجه و و و ، بحيث ان هما يبقوا موجودين علي طول اونلاين. فتلاقي المديرين عايزين الموظفين شغالين في الشغل وفي البيت وفي المواصلات وفي الاجازه، في اي وقت بيفكروا في الشغل.
ييجي بقي موظف يبقي مريض وياخد اجازه يوم، تحصل مشاكل الدنيا والاخره. فبعد ماكان الموظف بيشتغل من وقته بكل حماس وقوه عشان يخلص الشغل ... دلوقتي مش هيبقي فارق معاه اي شغل ولا اي حاجه .

الموظف اللي هيشتغل ويفكر في شغله تقريبا 24 ساعه في اليوم طول الاسبوع اكييد مستني مقابل قصاد ده، فلما بيلاقي مفيش مقابل وان العلاقه ماديه زي اي مكان تاني، فبيبدأ يتعامل بالعالم الثاني عالم الماديات.

طالما الفلووس دخلت في النص عالم الاجتماعيات بيختفي تماما.

لما الشركات بتنتقل بسهوله بين العالمين والموظفين تفضل رايحه جايه بين ده وده. هل بعد كده تلوم الموظف لما ميكونش عنده ولاء ويسيب الشركه ويروح لشركه تانيه ببساطه ؟؟؟؟

ولذالك تلاقي الناس اللي شغاله علي لينكس مثلا ( البرامج مفتوحه المصدر)، بيدي من وقته ومجهوده كل حاجه مقابل لا شيء لان هو بيعمل ده خدمه للبشريه. جرب تدخل تقول علي مشكله معينه او اقتراح معين للينكس هتلاقي مئات الردود في ثواني. الناس بتبقي سعيده وهي بتعمل ده. لو الموضوع اتحول تجاري لا هتقدر تدفع مرتبات الناس دي ولا الشغل هيطلع بنفس الجوده دي.

لازم يبقي فيه فهم ان المرتب لوحده مش هيخلي الناس تضحي عشان شغلها. مثلا الضابط او العسكري اللي شغال بمرتب 1000 او 2000 او 3000، هل ده مرتب كافي انه يخاطر بحياته كلها ؟؟؟ اكيــــد لأ ... الفكره كلها انه شايف انه بيأدي خدمه لاهله وبيحميهم ويدافع عنهم. الاحساس ده هو اللي بيخليهم يكملوا في شغلهم وميسيبوهوش.

الفلووووس هي اغلي حاجه تعمل تحميس للناس ... الاجتماعيات هي ارخص واكتر طريقه بتجيب نتيجه في تحميس الناس.

المصادر : 


Monday, August 5, 2013

ابو بلاش

حصل معاك قبل كده وخدت كوبون لاكله مجانا في مطعم ؟؟؟ تيشرت بيتوزع دعايه لشركه معينه ؟؟؟؟ نتيجه ... قلم ... اي حاجه ؟؟؟
الحصول علي شيء مجاني بيدي للواحد سعاده غير مبرره .... الصفر هو عباره عن سعر للسلعه لكن عاطفي شويه الواحد مبيقدرش يقاومه.
لو في خصم علي حاجه من 10 جنيه ل5 جنيه هتشتريها ؟؟؟؟ احتماااال 
لو الخصم وصل بقي ب1 جنيه هتشتريها ؟؟؟ احتمااااال
طب لما تبقي مجاني وتوصل ل0 جنيه هتاخدها ؟؟؟؟ اكيــــــد أوماااال

ابو بلاش بيخلينا ناخد قرارات غلط كتيـــــر في حياتنا تخيل رايح تشتري بنطلون معين مثلا ... وبعد ما دخلت المحل لقيت في بنطلون تاني مش حلو اوي بس معاه قميص مجاني .... في الغالب هتشتري اللي عليه القميص مع انك ممكن تركنه في البيت متلبسوش او يكون اي كلام ويبوظ.

واحد كان رايح يشتري عربيه أودي في دماغه ... لما راح يشتري لقي معروض عربيه هوندا شكلها ابن ناس ومعاها عرض تغيير زيت مجاني لمده 3 سنين قدام. الراجل مقدرش يقاوم واشتري العربيه الهوندا (والزيت المجاني) ... بعد كام شهر العربيه بدأ حاجات فيها تبوظ وتعطل واكتشف انها اسوأ بكتيـــر من الاودي اللي كان عايز يشتريها ..... كمان لقي ان العربيه بتغير زيت كل سنه ونص ب 75$ يعني في ال3 سنين المجاني هيغير زيت ب150$ بس يعني تقريبا 0.5% من ثمن العربيه . لكنه كعادة الناس اتسحر بوجود شيء مجاني اشتري حاجه مش كويسه من غير ما يفكر.

ابو بلاش بيدي للواحد شحنه عاطفيه بيخليه يحس ان ليه قيمه اكبر بكتير من قيمته. وده ممكن تفسيره انك مبتبقااش حاسس بمخاطره انك ممكن تخسر حاجه ... بمعني انك لو اشتريت حاجه وطلعت مش كويسه هتضايق لكن لو هي ببلاش اصلا هتبقي مش فارقه معاك.

سؤال سريع : لو قدامك كوبون قيمته 10 جنيه شراء ببلاش وقدامك واحد تاني قيمته 20 جنيه شراء بس تمنه 7 جنيه .... هتختار ايه ؟؟؟

معظم الناس بتختار اول واحد مع انك لو فكرت شويه هتلاقي ان اول واحد بيوفرلك 10 جنيه والثاني بيوفرلك 13 جنيه .

تخيل مثلا في ايس كريم بيتوزع مجانا ... هتلاقي ناس ممكن تقف في طابور نص ساعه او ساعه عشان تاخد الايس كريم مع ان الوقت ده ممكن تستفيد بيه في حاجات كتيير احسن واقيم من انك تاخد ايس كريم مجاني.

ومن هنا تيجي فكرة "Demo" او "Trial" جرب قبل ما تشتري اللي في معظم البرامج دلوقتي ... تنزل البرنامج وتجربه وتعرف بيعمل ايه وبعدين يقولك يا تشتريه يا مفيش.

نفس الفكره بيعملها بطاطس اند زلابيه قدام المحل ... واحد واقف بيوزع زلابيه علي كل اللي ماشي فتاكلها فتعجبك فيجر رجلك وتروح تشتري.

برده نظام سلفني في الموبايل اللي بيديك 3 جنيه وياخدهم 3.5 تقريبا .... ببساطه انت ممكن تروح تجيب كارت شحن لكن بما ان ده ببلاش ومش هتحس بالم انك تدفع فلوس فبتستلف وتيجي بعد كده تلاقي نفسك دفعت اكتر بكتير.

وعلي رأي المصريين : ابو بلاش كتر منه

المصادر : 

شكر خاص : 
  • عمرو سمير
  • اسامه الطيب 

والسلام عليكم :)

Sunday, August 4, 2013

علي حسب

في يوم من الايام دي كانت اسعار الاشترك الشهري في مجلة ايكونومست :
  • اشتراك اونلاين فقط                  --- 59$
  • اشتراك النسخه الورقيه              --- 125$
  • اشتراك اونلاين + نسخه ورقيه      --- 125$
هل دي غلطه مطبعيه ... طب هل هما اغبياء للدرجه دي عشان يحطوا حاجتين بنفس السعر ؟؟؟
الاجابه لا طبعا ... هما عارفين ان معظم الناس هتروح لاختيار اونلاين بما انك كده كده بتشوف الاعلان علي الانترنت اصلا ... فهما كانوا عايزين الناس تسيب الاختيار ده وتروح لاختيار اغلي شويه وهو اونلاين وورق مع بعض لان كطبيعه بشريه الناس هتحس ان ده احسن كتير وارخص لان الجريده الورقيه بس ب 125$ وهو هياخد معاها اشتراك اونلاين كمان.

الناس عادة متعرفش ثمن الحاجه وعاده بيركزوا علي علاقة الحاجه دي باللي شبهها .... بمعني لو انت حاليا قدامك تكييف 1.5 حصان متعرفش تمنه كام وقدامك تكييف 3 حصان متعرفش تمنه كام برده ... بس بالمنطق ان ال 3 حصان اغلي من ال 1.5 حصان .... فرق السعر مابين الاتنين هو اللي بيخليك تحدد هتشتري مين.

يعني مثلا في واحد صاحبي راح يشتري تلفزيون لقي الاسعار دي :
  • تلفزيون عادي 47 بوصه  --- 5000 جنيه
  • تلفزيون ذكي 47 بوصه  --- 5600 جنيه
  • تلفزيون عادي 55 بوصه  --- 9000 جنيه
معظم الناس بتشتري التلفزيون الذكي .... وده اللي صاحب المحل عايز يبيع منه اكتر كميه فعلا .... هو خلي فرق السعر بين ال 55 بوصه والتلفزيون الذكي كبيــر فبقيت انت شايف ان ال التلفزيون الذكي رخيص بالنسبه للعادي ال47 بوصه فبالتالي معظم الناس بتشتريه.

مثلا لو انت رايح محل تشتري ساندوتش فراخ كومبو ب35 جنيه وانت كنت شفته في مكان تاني بعيد عنك ربع ساعه ب20 جنيه ... هتشتري ولا هتروح تجيبه من هناك --- مع افتراض نفس الجوده ؟؟؟
طب لو رايح تجيب بدله ولقيتها ب1015 جنيه وواحد جه قالك انها في مكان تاني علي بعد ربع ساعه ب1000 جنيه بس هتعمل ايه ؟؟؟
هتلاقي ان فرق السعر في كلتا الحالتين واحد (15 جنيه) ونفس الوقت هيضيع (15 ساعه) ... بس فرق السعر بين ال15 جنيه واللي هتدفعه هو اللي هيحدد قرارك في تضييع الربع ساعه ولا لأ.

طبيعة الانسان انه مش عارف هيعمل في حياته لحد ما يشوف حد او حاجه قريبه للي هو حاسس انه المفروض يعملها فيبدأ يعمل زيها. دي بتحدد معظم قرارات الانسان بس بتعمل مشكله لانك من كتر ما بتراقب الناس وتقارن نفسك بيهم بيبقي فيه غيره وحسد وكل ما لذ وطاب لدرجه ان الغني بيحسد الاغني منه والاغني منه بيحسد الاغني منه وهكذا.

المصادر : 

شكر خاص : 
  • عمرو سمير
  • مصطفي نجيب 
  • اسامه الطيب 

والسلام عليكم :)

Friday, August 2, 2013